ـ خدتي إيه ـ
ـــــــــــــــــــ
خدتي إيه م الدنيا ياللي
عايشه مجروحه تملي
وخانقه روحك جوه أمبوبه قلم
مركونه فوق كشكول حياه
جواه ملامح حب تاه
وبواقي من ضحك السنين
عماله تحرق جوه قلبك م الحنين
ومغيره في لون العنين
خلت الإسود يداري لون خدك
يرسم الحزن الحزين
ياللي إنتي عايشه في الإنين
خبي دمعك وإسكري
جوه لذه جرح قلبك
حسي بالمتعه اللي فيه
علمي نفسك تحبك
واللي باعك إدعي ليه
علميه إن الفراق...ساعه وجع
واللي عمله بكره...تاني هيلاقيه
وارسمي ضحكه بملامحك
علمي قلبك يسامحك
وافتحي صفحه حياه
سطري فيها الفرح
وانسي إن قلبك انجرح
خليكي واثقه إنه بكره....جاي خير
دا إنتي الملاك الطيبه
مكتوبلك الحب بضمير
إن كنتي عايشه جوه جرح
الفرح بكره يبقي ليكي خط سير
وتعيشي مذهوله في سكوت
فـ يمر تتر الماضي يبكي
وضحكتك هتهز في الملكوت
فـ تحسي إنك روحتي جنه...بعد موت
----------------------------------
بـقــلم:-
أحـمـد عـبدالـبـاقـي
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.