اله الكون بقلم ‏فهمى_على

اله الكون
‫‏فهمى_على‬

اله الكون .... انا عاصى
لكن عشمان اوى فى توبة
و حملى م الذنوب مايل
و ياما عدلته ميت نوبة
و نفسى خارجة عن طوعى
و حرمانى اكون راضى
بتختار سكة ما اعرفهاش
اروح و اجى على الفاضى
باسافر فى الضياع مشاوير
مفيش مرة لقيت روحى
و ياما بكيت و انا وحدى
و ياما زهقت من بوحى
دروب الدنيا ضاقت بى
و جوايا باعيش خنقة
و روحى و الوسع فيا
على روحى بقوا زنقة
انا يا رب من خلقك
و محتاجلك تداوينى
ماليش غيرك يا عالمبى
يا مالك سر تكوينى
و طمعان ربى فى عفوك
و فى حلمك و غفرانك
و نظرة من رضا عزك
اكون بيها فى رضوانك