الشاعر الرائع طاهر شامخ عبدالجواد
أصعب شيء
أصعب شيء المر يسلم
ونهار يجري قوام ويفوت
ودموع فوق الخد تعلم
تحرق ورد وتخنق صوت
أصعب شيء لما تكون راضي
عايش عمرك إنسان عادي
لا بتكره ولا يوم بتعادي
والناس تتمنالك الموت
أصعب شيء لما تكون ماشي
في طريق عارف آخره تابوت
جواك جرح قديم من ماضي
كل ما تنسى يقولك توت
أصعب شيء إنك تتحامل
على نفسك وتروح وتجامل
قلب بيحقد وبيتحايل
علشان يقطع شجرة توت
أصعب شيء لما تكون هادي
والناس شايفه إنك حوت
لما تمد إيديك وتلاقي
حد يشوطك بالشلوت
لما الصرخة تكون مكتومة
لما الغنوه تكون مهمومة
لما الدنيا تكون مرسومة
لجل ما يفرح بس طاغوت
أصعب شيءالظلم يشاور
يجرح طير مش لاقي القوت
يبني قصور مليانه أساور
وخزاين مرجان وياقوت
لما القبر يلم بشاير
لما العدل يكون مش ساير
لما تشوف إبنك بيساوي
بس باعوضه او برغوت
أصعب شيء الحق ينادي
وتخاف من ضربة نبوت
متغمي ومكتوفه أيادي
متصلب مربوط ف عمود
لما الآه تطلع من جوفك
كاره عيشتك ضايع صوتك
حتى الإبن خرج عن طوعك
والبنت ف شرفك بتغوط
أصعب شيء المر يسلم
ونهار يجري قوام ويفوت
طارق شامخ
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.