مبدأ القوة؟:
مْنْ مْكَانِي نْشُوفْ وْلاَدْ صْغَارْ
يْلْعْبُوا وْ يْدَّابْزُوا وْ الْقُوَّة شِعَارْ
بِينْ طِفْلْ قْوِيّْ وْ طِفْلْ ضْعِيفْ
حْكْرَة عْظِيمَة وْ خُوفْ وْ انْكِسَارْ
مْنْ صْغْرْهُمْ وْ فْطْرِيقْ الظُّلْمْ الْمَسَارْ
فْكْبْرْهُمْ حُرُوبْ وْ سَفْكْ الدِّمَاءْ
قُلُوبْ بَرِيئَة تْكْبْرْ بْظُلْمْ إِعْصَارْ
فْصْغْرْنَا بِنَاءْ مَا لِيهْ سَاسْ
كِيفَاشْ فْكْبْرْنَا بَاغْيِينْ حُبّْ وْ إِحْسَاسْ
كَا تْسِيرِي يَا قُوّة فْدْرْبْ الانْتِصَارْ
لْتَرْبِيَة أَطْفَالْنَا دَايْرَة حِصَارْ
يْكْبْرُوا طُغَاةْ يْدْمّْرُوا الْحَيَاة
بْضَمِيرْ مْيّْتْ وْ الْحُبّْ فْافْتِقَارْ
فِينْ التّرْبِية وْ فِينْ التَّعْلِيمْ
وْ فْالطُّفُولَة لْلْقُوّة كُلّْ التَّسْلِيمْ
فْعْقُولْنَا ظْلْمَة وْ الْجَهْلْ مُقِيمْ
الْوَعْيْ فْكْبْرْنَا فْعْقُولْنَا مَا يْضِيمْ
بْالْعْصَا الْخُوفْ يْزِيدْ وْ يْكْبَارْ
لِّي يْقُولْ الْحَقّْ نْعَامْلُوهْ بْاحْتِقَارْ
مْنِينْ عْلَى مَصَالِحْنَا نْخَافُوا
نْبْدَاوْا نْعْذّبُوا وْ نْقْتْلُوا وْ نْحْرْقُوا بْالنَّارْ
نْغْتَاصْبُوا وْ نْسْفْكُوا الدِّمَاءْ
نْمْلاَوْا دُنْيَانَا غِيرْ بْالدَّمَارْ
حْرُوفْ الْقُرْءَانْ حْرُوفْ ثْقَالْ
مَعَانِيهَا تْهْدّْ فْالدّْنْيَا أَقْوَى جْبَالْ
دْوَا للصُّدُورْ وْ للعُقُولْ وْضْعْنَاهَا فْاعْتِقَالْ
نْحْرّْكُوا بِهَا لْسَانَّا وْ نْمْجّْدُوا إِسْلاَمْنَا
وْ فِينْ إِيمَانَّا وْ قْلُوبْنَا عْلِيهَا مَا تْسَالْ
ضْيّْعْنَا الْحْرُوفْ وْ هْدِّينَا الآمَالْ
بْطْمْعْ الْقْلُوبْ وْ بَنِينْ وْ مَالْ
تْبّْعْنَا حْرُوفْ غْنَا حَقِيرْ
بْأَصْوَاتْ أَنْكَرْ مْنْ أَصْوَاتْ الْحَمِيرْ
وْ حْرُوفْ فْنَّانْ فْالْفْنّْ خَبِيرْ
عْلِيهَا نْدُوسُوا وْ مْتّْبْعِينْ الفْنّْ الْحَقِيرْ
هَاذْ الطُّفُولَة تْنْبْتْ فْالْخُوفْ
نْرْمِيوْا فَشَلْنَا دِيمَا عْلَى الظُّرُوفْ
تْشْكِي الْحْرُوفْ تْبْكِي الْحْرُوفْ
عْلَى أُمّة ضَايْعَة أُمَّة عْمْيَانْ
عِينِيهَا تْشُوفْ وْ فْلْبْهَا مَا يْشُوفْ.
...................من توقيع/الخائف من الظلم المهدي العمري.
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.