يَأْسْ مُنَاضِلْ:
صَافِي خْسْرْتْ
ضَمِيرِي لْحْتْ
وْ الْحَنَانْ بْتْرْتْ
الْحُبّْ يْتْحْسّْرْ
فْ قْلْبِي يْعْثْرْ
وْ أَنَا مْبْعْثْرْ
صَافِي دّْمّْرْتْ
يْقُولْ لِي عْنْدِي مْبْدْأْ نْضْحْكْ
نْقُولْ لِيهْ عْلِيكْ رَاه أَ يْوْرّْكْ
أَ تُّوهْ فْ بْحُورْ جَهْلْ قْتَّالْ
تْصِيرْ مْنْحُورْ وْ هْمُومْكْ جْبَالْ
الْمْبْدْأْ فْ قْبُورْ مَا هُو عْلَى بَالْ
نَاسْ بْ الْهْوَى وْ الْفْسَادْ تّْرْوَى
يْعْبْدُوا الشّْهْوَة وْ سُلْطَة وْ قُوَّة
وْ مَالْ وْ بَنُونْ.................
فْ حْيَاتْهُمْ خِدَاعْ نِفَاقْ وْ قْسْوَة
فْ طْرِيقْ الْمْبْدْأْ غَادِي تْهْوَى
طِّيحْ مَا تْنُوضْ تْصِيرْ مْفْقُودْ
الظَّالْمْ يْرْبْحْ جْنَاحُو مْفْرُودْ
جَاهْلْ يْسْرْحْ بْ مَالُو مْعْبُودْ
الْمْبْدْأْ يْمُوتْ وْ التَّفَاهَة تْسُودْ.
.....................من توقيع/المهدي العمري.
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.