الجيب خاوي بقلم الشاعر المهدي العمري

الْجِيبْ خَاوِي:

الْجِيبْ خَاوِي وْ مَا بْغِيتْ نْكْفْرْ بْالنّْعْمَة 

الْجِيبْ خَاوِي وْ قْلْبِي رَاضِي بْالْقْسْمَة 

الْجِيبْ خَاوِي وْ أَنَا وِيَّاهْ نْبْكِي 

خْطَانَا الْمَالْ لْمّْنْ يَا نَاسْ نْحْكِي

الْجِيبْ خَاوِي وْرَافْعْ رَاسِي لْلسّْمَا 

الْجِيبْ خَاوِي وْ الْغْلاَ فْالْبْلاَدْ رَاهْ يْحْمَا

الْجِيبْ خَاوِي وْ عَايْشْ فْالذُّل وْ الْمْحْنَة

وْ جْيُوبْ عَامْرَة عْالّْمْعْرُوفْ رَاهْ تْعْمَا 

الْجِيبْ خَاوِي وْ عْالْحْرَامْ رَانِي بْعِيدْ 

وْ ذَاكْ جِيبُو عَامْرْ وْ رَاهْ بَاغِي يْزِيدْ

نَاسِي النَّاسْ وَ لاَ بْلاَدُو يْفِيدْ

وْ إِيلاَ صْدّْقْ يْرْدّْ النَّاسْ عْبِيدْ

الْجِيبْ خَاوِي وْ قْلْبِي عَامْرْ بْالنّْشْوَة

جِيبُو عَامْرْ وْ يْزِيدُو يَا نَاسْ بْالرّْشْوَة

الْجِيبْ خَاوِي وْ قْلْبِي بْالإِيمَانْ ضَاوِي

مْعْمّْرْ جِيبُو وْكَافْرْ بْالله وْ غَاوي

الْجِيبْ خَاوِي وْ بَاغِي الْحْلاَلْ يْعْمّْرُو

وْ الْحْلاَلْ مْنْسِي طْمْعْ الإِنْسَانْ مْدْمّْرُو

كِيفَاشْ يْعْمْرْ وْ قْلْبِي وَ لاَ حْدّْ عْبّْرُو

عْلِيهْ الشِّيطَانْ وْ الْحْرَامْ آهْ يَا نَاسْ تْآمْرُو

الْجِيبْ خَاوِي وْ مْريضْ عَايْشْ بْالدّْوَا

جُرْحِي عْرِيضْ وْ زْمَانِي يْزِيدْ قْسْوَة

فْقْلْبِي شُوكْ وْ طَايْرْ فْسْمَا النّْخْوَة

الْجِيبْ خَاوِي مَا عْنْدُوشْ فْبْلاَدْنَا دْوَا.

................................................من توقيع/المهدي العمري.