مُسْلِم فْ مِجْهَرْ:
صُوتْكْ يَا مْسْلْمْ مَاتْ
جَامْدْ كِي صْخْرَة
قُرُونْ فْهَاذْ الْحَياةْ
مْنْ الْحْكْرَة مَا تْبْرَا
جُوعْكْ للْمَالْ زَادْ وْ زَادْ
عْنْدْكْ صَارْ هُوَ الْمُرَادْ
تْقُولْ دْمِّي يْسِيلْ
عْلَى الأَوْلاَدْ وْ الْبْلاَدْ
غِيرْ مُنَافِقْ كْذَّابْ
بْفْسَادْكْ سَايْقْ الْعْنَادْ
طْلّْ عْلَى تَارِيخْ لِيكْ فِيهْ كَيَانْ
رَغْمَ الأخْطَاءْ وْ الذُّنُوبْ
كَانْ فْأَعْمَاقْكْ يْعِيشْ الإِنْسَانْ
دَازْ الْوْقْتْ وْ تْهْتِي فْالْمْكَانْ
صْرْتِي بْالْوَهَنْ مْسْجُونْ فْظْلاَمْ
الْحِكْمَة رْمِيتِيهَا بِينْ الْأزْبَالْ
مَا تْفْكّْرْ بْعْقْلْكْ غْشَّاشْ وْ نْقَّالْ
وْ بْوَقَاحَة تْدَافْعْ عْلَى الْحْلاَلْ
فْكْلاَمْكْ دِيمَا مَجَازْ
فالقُرْءَانْ رْحْمَة وْ إِعْجَازْ
وْ انْتَ ضْعِيفْ مْنْ عَجُوزْ
تّْنْكْسْ وْ مَا بْقَى عْلَى بَالْ
تْصْطَادْ كْلاَمْ يْبَانْ لِيكْ زْوِينْ
وْ تْنْشْطْ وْ تْغْنِّي يَا لِيلْ يَا عِينْ
بْنْفْسْ وَاطْيَة مَا اتَّبْعْ لاَ مْلَّة لاَ دِينْ
تْغْنِّي غْنَا شْعْبِي عَاصِي كْلاَمُو رْبِّي
بَاشْ تْنْسِّي هْمّْكْ الْعْظِيمْ
وْ لاَّ تْحْقْدْ وْ دّْمّْرْ بِاسْمْ الدِّينْ
تْحْرْقْ تْذْبْحْ تْعْدْمْ وْ تْخْرّْجْ فِينَا الْعِينْ
وْ تْقُولْ احْنَا كُفَّارْ وْ تْعْيّْشْنَا فْعْذَابْ أَلِيمْ
دِينَّا دِينْ مَوَدَّة وْ رَحْمَة وْ حُبّْ وْ حَنَانْ
كَفَانَا مْنْ سَفْكْ الدِّمَاءْ فْاتِّحَادْنَا نْكُونُوا مْتَّافْقِينْ
عْلَى كْلْمَة وْحْدَة نْهْدُّوا الْفْسَادْ هْدَّة
وَفَاءْ وْ تَسَامُحْ وْ عِقَابْ بْأَحْكَامْ بْمِيزَانْ مْصَايْبِينْ
تْمُوتْ بِينَا الْمْعَانْدَة وْ قْلُوبْنَا لْبْعْضْنَا مْسَاعْدَة
تْصِيرْ تْنْبْضْ بْنُورْ الرَّحْمَانْ
حَامْلَة نْفْحَة مْنْ قْلْبْ الصَّادْقْ الأمِينْ.
...............................من توقيع/الخائف من الظلم المهدي العمري.
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.