وَاقِعْ مُرّْ:
عْلَى الْجْمْرَة قَاعْدْ وْ الدّْبْرَة مَا تْبْرَا
عْلَى بْلاَدِي نْتْمْزّْقْ وْ نْمُوتْ
وَاخَا فَقِيرْ قْلِيلْ الزَّادْ وْ الْقُوتْ
وْ الْخَايْنْ نْفْسُو بْفْسَادْهَا حُرَّة
هْزّْ الْكْفّْ وْ مْدّْ الإِيدِينْ
فْاتِّحَادْنَا كُلّْنَا وَاحْدْ
وْ يْكُونْ الْحُبّْ فْالْقْلْبْ وْ الْعِينِينْ
لِّي فِينَا بْدِينْ وْ لِّي فِينَا بْلاَدِينْ
عْلَى كْلْمَةْ وَسَطْ نْكُونُوا مْتَّافْقِينْ
فْالْوَاقِعْ نْمْشِي وْ قْلْبِي عْرْيَانْ
بِينْ قْلُوبْ مَا تْحْنّْ وْ تْكْسِي الإِنْسَانْ
لْقِيتْ لِّي يْمْدّْ إِيدُو عْلَى خِيرْ غِيرُو
مَا يْهْمُّو ضَمِيرْ وَ لاَ الرّْحْمَانْ
فُوقْ حْفَايَ يْرْدّْنِي جِيعَانْ
وْ الْجْمْرَة تْقِيدْ وْ الدّْبْرَة تْزِيدْ
يْقْتْلْ قْلْبِي وْ يْعْدْمْ الأَمَانْ
نْفْتْحْ لْصَبْرِي بِيبَانْ
تْحِيطْ بِيَّا قْيُودْ وْ نِيرَانْ
وْ قْلْبِي يْتُوهْ مْنُّو الإِنْسَانْ
نْيْأْسْ وْ مَا نْيْأْسْ فْتُوهَة حَيْرَانْ
جْمْرَاتْ تْحْتِي وْ فُوقِي جْمْرَاتْ
الثَّوَانِي أَعْوَامْ وْ قُرُونْ السَّاعَاتْ
يْهْجْمْ فْأَعْمَاقِي طُوفَانْ الآهَاتْ
عُمْرِي يْنْزْفْ دْمّْ ضَاعْتْ الْحَيَاةْ
يْمْكْنْ فِيهْ أَمَلْ وْسْطْ الْجُمُودْ
يْمْكْنْ فْيُومْ تّْهْدّْ الْقُيُودْ
يْمْكْنْ الْحُبّْ بْحَقّْ يْسُودْ
يْمْكْنْ الْجِنْسْ يْعَارْفْ الْحُدُودْ
يْمْكْنْ رْبِّي بْالْحَقِيقَة عْلِينَا يْجُودْ
وْسْطْ هَاذْ التُّوهَة وْ العْنَادْ وْ الصُّدُودْ.
.............................................من توقيع/الخائف من الظلم المهدي العمري.
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.