زمن الخدع...بقلم رشااد الدهشوري..

زمن الخدع

صعبان عليا دا الجدع
بعد المذاكره والسنين
ضرسه اتخلع
كل الوظايف خصصوها
ووضبوها لنسلهم
مهى ارضهم
عزبة ابوهم جدهم
زمن الوجيعه والخدع
من كدبهم بيوصلوك حد الشبع
ويرسمولك كام شعار
يااما جنة ياإما نار
وما فيش خيار
يا تعيشها فار
تجرى وتخطف لقمتك وسط العفار
يا تعيش حمار
وتهز ديلك للكبار
حظك كده يا دى الجدع
اسكت وكرشك يتنفخ
هتعلى صوتك تبقى كاره للبلد
أو إمشى جنب الحيط
واهو كمالة عدد
أو عيش عبيط
سيح فى الموالد
قول مدد
انفض تراب الصمت قوم
ولاانت هتقضيها نوم
خليك أسد

عند اللزوم
زمجر وزوم
قوم يا جدع
واوعى الندم
وواعاك تنام
وتحرس الديب ع الغنم
صحصح وفوق
راسك دى ديما تبقى فوق
المصر ى مهما جاع ما باع
المصرى اشجع من شجاع

ومافيش حياه من غير ألم
.....................................رشاد الدهشورى