انا ابوكي بقلم حسن بعيله

انا ابوكى ...
انا اخوكى ...
انا كل اللى حبوكى
....... بقصد طهاره النيه

انا الحد اللى يوم ماتكونى
محتاره
وتفكيرك يتوه بيكى
انا المرسى اللى يهديكى
ده لو عندك ثقه فيا ..

انا الانسان
فى وسط عيون من النسيان
بتنساكى

حبيبتى يا تايهه فى الدنيا
ايديا الحبل والقشه
تعالى اتعلقى فيا
هاشدك للبراح والبر
مش للغيمه والميه
انا ابوكى اللى سابك غصب غن خاطره
وشايف من يوميها عيونك انكسروا
وربك حكمه عدل ف عدل
فلو مات اب مش لازم يموت الكون
ده رب الدنيا قسمها
يا بعد يا قبل
انا ال ( بعد) اللى مكتوبلك
وحضنى مليته حنيه
حبيبتى يا تايهه فى الدنيا ....!!
...
مانيش مغرور
ولا باهذى وبارسم دور
بجد
انا حد
حاسس بالوجع فيكى
وقلبى اللى مشى دربك
وقف جنبك
وشافك زى طاقه نور
لكن محتاجه تتداوى ...
وتتواسا
وتنسى الجرح والضيقه ..
يا صديقه ( مؤنث صديق )
انا ضد اللى نسيوكى
انا ابوكى
انا اخوكى .... انا كل اللى حبوكى ....
‫#‏حسن_بعيله‬